Ном бичихэд ямар багаж хэрэглэх вэ?

Миний нэг мөрөөдөл бол мэргэжлийнхээ чиглэлээр ном бичих юм. Мөрөөдөөд л байвал нэг өдөр номтой болчихгүй нь лав. Иймд өнөөдрөөс номоо бичиж эхлэхээр шийдлээ. Цаг гарвал энд тэнд нь хэдэн мөр нэмэрлээд байхад хэзээ нэгэн цагт дуусгах л болно.

Ингэхэд номоо ямар форматаар, ямар програм хангамж хэрэглэж бичих вэ? Сургуульд байхад багш нар маань latex дээр бичдэг байсан санагдана, би ч яахав дипломоо Word дээр л халтайлгачихсан. Ер нь бол номыг энгийн хэрэглээний doc, txt гэх мэт форматаар бичдэггүй бололтой юм. Мэргэжлийн ном бичдэг, хэвлүүлдэг хүмүүс ихэвчлэн ямар форматаар хийдэг юм бол гээд жаахан интернэтээр тэмтэрвэл яах аргагүй tex/latex л голчлон хэрэглэгддэг юм байна.

За ингээд ном эхлүүлэх гэсэн биш шинэ юм сурах болвоо. Би угаасаа номоо бичих явцдаа зөндөө юм сурах төлөвлөгөөтэй учраас үүнийг сурах нь зүйн хэрэг гэж бодож байна. Би шинэ юм сурах дуртай, шинэ юм оролдох шиг сайхан зүйл хаа байхав.

Одоогоор LyX гэдэг нээлттэй эхийн програм суулгачихсан оролдож эхлэх гэж байна, latex энэ тэр судлаад байх шаардлагагүй энгийн эд гэж танилцуулга дээр нь байсан болохоор сонгов. Дараа боломж олдвол latex-ийг нухацтай үзнэ дээ.

Хэрэв танд ном бичих болон tex-ийн талаар туршлага байвал хуваалцахыг хүсье.