Unix ба Windows

Юникс төрлийн системүүд ба Виндовс системүүдийг харьцуулсан юм бичих гээд нилээн дээрнээс төлөвлөсөн боловч нэг л болж өгөхгүй байгаад байлаа. Аль алинд нь нөгөөгөөс давуутай зүйл байгаад байх шиг, эсвэл огт харьцуулах нь утгагүй ч юм шиг санагдаад байсан хэрэг л дээ. За ингээд өнөөдөр ямар ч байсан бичихээр шийдлээ.

Юникс ба Виндовс системүүдийг нууцлалын талаас нь, сэрвэр талаас нь, дэсктоп хэрэглээ талаас нь, философи талаас нь, энд тэндээс нь зөндөө л харьцуулж үзэж болох юм байна. Нэг өнцгөөс нь харахад Виндовс илүү, нөгөө өнцгөөс нь Юникс хол давуу байх аж. Миний бодлоор бол энэ хоёр системийг нэг нь муу, нэг нь сайн гэж хэлцэж маргах нь дэмий гэж хэлэх байна. Яагаад гэвэл эдгээр системүүдийн 1)хэрэглэгч, 2)хөгжүүлэгч 3)үзэл санаа нь тэс ондоо.

Нэг. Хэрэглэгч буюу зорилго нь өөр. Юникс нь интэрнэт болон сүлжээний орчинд идээшсэн зэрлэг амьтан бол, Виндовс гэрийн тэжээмэл амьтан гэж болно. Мэдээж Виндовс интэрнэтэд холбогдолгүй л яахав, гэхдээ яг гадагш гарах гарц нь ямар нэг юникс төрлийн систем байгаа гэдэгт итгэлтэй байна. Виндовсыг жирийн хэрэглэгчид голчлон хэрэглэдэг бол, мэргэжлийн хүмүүс юниксийг л илүүд үздэг юм.

Хоёр. Хөгжүүлэгчид, хүрээлэгчид нь ондоо. Юникс системийг жинхэнэ мэргэжлийн програмчид, хакерууд, сонирхогчид хөгжүүлдэг, ашигладаг. Тэдний бичсэн програм нь бусад нөхөддөө зориулагддаг болохоос програм мэдэхгүй энгийн хэрэглэгчдэд зориулагдаагүй байдаг. Харин Виндовс бол энгийн хэрэглэгч, мэргэжлийн бус хүмүүст зориулагдсан. Жишээ нь Виндовс дээр Program Files гэж байхад Юникс дээр bin.

Гурав. Юникс програмчлалын урлаг, үзэл санаа Виндовсынхоос тэс өөр. Жишээ нь юникс дээр програмын соорсыг дэлгэж өгөхийг зөвлөдөг. Ингэснээр хэрэглэгч програмыг өөрчлөх боломжоор хангагдаж байгаа. Би жишээ нь энэ XP-ийн монгол гарны товчлуурын байрлалыг өөрчилмөөр байдаг, даан ч боломжгүй. Тоон дээр дарахад тоо л гаргамаар байна, тэгтэл №-“₮:._,%? ийм тэмдэгтүүд гарч ирээд байх юм?

Тайлбар хийхэд: ажлынхаа ихэнх хэсгийг Линукс дээр хийдэг болоод удаж байсан боловч хол явах гээд хүний зөөврийн компьютэр аваад ирсэн болохоор яах ч арга алга. 99 хувь орчим Линукс дээр амьдарч чадаад байгаа ч заримдаа Виндовс руу орох хэрэг гарч ирээд болохгүй л байна. Гэхдээ удахгүй Виндовсоос бүрэн салж эрх чөлөөгөө тунхаглан зарлана гэдэгтээ итгэнэм. Ардчилал мандтугай.

Холбоос:

Санал болгох ном: